عموماً حفظ کے مدارس میں براہ راست حفظ کا رجحان تھا۔ اور اب بھی ہے لیکن اقرأ میں براہ راست شعبہ حفظ میں داخلہ نہیں ملتا۔ جب تک بچہ/بچی شعبہ قاعدہ کا نصاب مکمل نہ کرلے۔ اگر طالب علم قاعدے کے لائق نہ ہو تو پہلے ”روضہ” میں داخلہ دیا جاتا ہے۔ ان شعبوں میں مقرر نصاب کے ساتھ ساتھ طلبہ کو حفظ قرآن کے لیے ذہنی طور پر بھی تیار کیا جاتا ہے اور انھیں مدرسے کے نظم و ضبط کا عادی بنایا جاتا ہے۔

ماضی میں مختلف اندیشوں کے پیش نظر بچیوں کو حفظ کرانے سے گریز کیا جاتا تھا، بعض علماء بھی منع فرماتے تھے، لیکن اقرأ کے پہلے صدر حضرت مفتی ولی حسن ٹونکی نے واضح الفاظ میں بچیوں کو حفظ کرانے کی تائید کی اور بعد ازاں دیگر حضرات نے بھی بچیوں کے لیے بھی شعبہ حفظ کے قیام پر زور دیا۔ اب تو الحمدللہ حالات بدل چکے ہیں اور اقرأ میں طلبہ کے مقابلے میں طالبات کی تعداد بعض مقامات پر تو طلبہ سے نمایاں طور پر زیادہ ہے اور بعض خطوں میں تو حافظات کی تعداد حفاظ کے مقابلے میں نمایاں طور پر زیادہ ہے۔ اصل نکتہ یہ ہے کہ حفظ کی فضیلت میں بچے یا بچی کی تخصیص نہیں؛ بلکہ یہی بچیاں آگے چل کر نئی نسل کی آبیاری اور تربیت کرتی ہیں۔ لہٰذا ان کی گھٹی میں دین اور قرآن کا ہونا لازم ہے۔ رہا یہ اندیشہ کہ بچیاں قرآن بھول جائیں گی، تو یہ امکان تو بچوں میں بھی موجود ہے، تو کیا اس بناء پر بچوں کو بھی حفظ سے روک دیا جائے؟ یقیناً حفظ لازم تو نہیں لیکن حفظ کر کے اسے محفوظ رکھنا، یاد رکھنا لازم ہے اور یہ ضابطہ لڑکے اور لڑکی دونوں کے لیے یکساں ہے۔

حفظ کے مدارس عموماً اقامتی ہواکرتے تھے، جہاں طلبہ شب و روز تعلیم میں مصروف عمل رہتے، ان کا قیام و طعام بھی وہیں ہوتا تھا۔ یہ قربانی نہ تو ہر طالب علم دے سکتا تھا اور نہ ہر ماں باپ میں اس کا حوصلہ تھا۔ ان دشواریوں کے پیش نظر اقرأ نے روزِ اول سے طے کیا کہ بچوں کو صبح سے دوپہر تک پڑھایا جائے گا، جس کے بعد طلبہ اپنے گھر واپس جاسکیں گے۔ والدین کی سہولت کے لیے ٹرانسپورٹ کا انتظام بھی کیا گیا۔ تاہم ٹرانسپورٹ کی تمام ذمے داری والدین اور ٹرانسپورٹر پر ہی عائد ہوگی۔

اقرأ میں رائج داخلے کے ضوابط کے تحت ہر شعبے میں عموماً ہم عمر اور ہم سن طلبہ/طالبات کی کلاس تشکیل پاتی ہیں۔ اس بات کا خاص خیال رکھا جاتا ہے کہ کسی بھی کلاس میں طلبہ/طالبات کے درمیان عمر اور درجے کا فرق نہ ہو۔

مدارس اور مکاتب کے حوالے سے (صحیح یا غلط یہ معاملہ ہے) یہ شکایت عام رہی ہے کہ یہاں مار پیٹ بہت زیادہ ہوتی ہے۔ اقرأ نے اس شکایت کو پوری سنجیدگی سے دور کرنے کی کوشش کی اور مار پیٹ کے بغیر تعلیم وتربیت کا بیڑہ اٹھایا۔ ہم یہ تو نہیں کہتے کہ اقرأ نے اپنے اس مقصد میں مکمل کامیابی حاصل کرلی لیکن یقیناً آپ یہ بھی نہیں کہہ سکتے کہ اقرأ کامیاب ہوگیا۔ الحمدللہ ہمیں اتنی کامیابی ضرور ملی ہے کہ "اب یہ تصور ختم ہوچکا ہے کہ مار پیٹ کے بغیر حفظ ممکن نہیں”۔ اس حوالے سے ہمارے اکابرین کی توجہات، دعائیں اور بر وقت سخت گرفت نے بنیادی اور موثر کردار ادا کیا ہے۔ اللہ تعالیٰ ان سب کو جزائے خیر عطا فرمائیں۔ آمین۔

ہمارے اکابرین اور اساتذہ اپنے حلقہ تعارف میں اس بات پر زور دیتے رہے ہیں کہ اگر ہم اپنی نسل کو لادینیت کے مہلک اثرات سے بچانا چاہتے ہیں تو ان کے شب و روز میں دینِ اسلام اور قرآن کریم کی تعلیمات کو شامل کرنا گزیر ہے۔

• قرآن کریم کے حفظ کی نعمت کو عام کریں، بیٹوں کے ساتھ ساتھ بیٹیوں کو بھی اس مہم سعادت سے بہرہ مند کریں۔
• حفظ قرآن کے نور سے ذہن کے درچے واہوتے ہیں، جس سے دینی اور دنیاوی علوم کا حصول آسان ہو جاتا ہے۔ (جس کا مشاہدہ عام ہے)
• حفظ قرآن میں صرف ہونے والا وقت کبھی ضائع نہیں ہوتا۔ اگر ترتیب مناسب ہو تو حفظ کرنے والے طلبہ و طالبات بھی اسی عمر میں میٹرک کرلیتے ہیں جس عمر میں غیر حافظ بچے کرتے ہیں۔ جب کہ حافظ طلبہ/طالبات میٹرک کے ساتھ حفظ کی برکات سے بھی مالا مال ہوتے ہیں؛ (ماشاءاللہ) (وفاق المدارس اور عصری تعلیمی بورڈ کے نتائج اس پر شاہد عدل ہیں)۔